Vøringsfoss
Opplev historiske Fossli Hotel ved Vøringsfossen, med storslått utsikt over Måbødalen. Hotellet byr på komfortable rom, restaurant med alle rettigheiter og ei unik oppleving i spektakulære omgjevnader.
Fossli Hotel er eit sjarmerande sommarhotell som held ope frå 18. mai til 15. september.
Hotellet ligg på ein heilt unik stad, høgt over den mektige Vøringsfossen, med storslått utsikt over den dramatiske Måbødalen. Sidan etableringa i 1891 har Fossli vore eit populært reisemål for både naturentusiastar og kulturinteresserte. Då hotellet opna, fanst det enno ingen vegsamband frå Eidfjord – gjestene måtte ta seg fram til fots eller med hest og kjerre.
Gjennom meir enn hundre år har hotellet teke imot besøkande frå heile verda som har kome for å oppleve fossen, fjella og den spektakulære naturen. Den verdskjende komponisten Edvard Grieg var mellom dei faste gjestene. Under opphalda sine på Fossli arbeidde han med fleire av komposisjonane sine, og på sitt faste rom harmoniserte han mellom anna Opus 66.
Hotellet har 21 rom, alle med eige bad, og tilbyr ei hyggeleg og autentisk overnatting i historiske omgjevnader. På hotellet finn du også restaurant med alle rettigheiter, der gjestene kan nyte gode måltid og utsikta mot den storslåtte naturen rundt.
I dag kombinerer Fossli Hotel historisk sjarm med nærleik til nokre av dei mest kjende naturattraksjonane i Noreg, og er eit perfekt utgangspunkt for å utforske Vøringsfossen, Hardangervidda og resten av Hardanger.
Kilde: Destination Hardanger Fjord AS