Seljord Kyrkje

Steinkyrkje i romansk stil bygd ein gong på 1100-talet, og vigsla Heilag Olav. På nord-vest hjørnet er det hogge ut eit andlet som etter ei segn skal vere heilagkongen. Ei segn fortel også at kyrkja vart bygd av ein tusse. Da bygningen var ferdig, datt tussen ned og slo seg i hel. Der han datt, veks det ikkje gras den dag i dag. Altertavla i kyrkja er frå 1588 og døypefonten frå 1600-talet. Riksantikvaren leidde ei omfattande restaurering avslutta i 1972. 

Seljord kyrkje er ei steinkyrkje i romansk stil, bygd mellom 1150 og 1180 og restaurert av Riksantikvaren frå 1965 til 1972. Kyrkja har avlangt skip og tilnærma kvadratisk kor med apside, det vil seie i halvbogeforma avslutning. Våpenhuset i vest er frå omkring 1630 og bygd i stavkonstruksjon. Takryttaren, som er frå 1710, vart i forbindelse med restaureringa tjæra for å passe betre til våpenhuset. Kyrkja si einaste skulpturutsmykking finnast på hjørnet av skipet mot nordaust og førestiller eit mannshovud med kraftig skjegg. Kyrkja er via til St. Olav.

Vindauga mot syd i både kor og skip er utvida fleire gonger, seinast i 1831, mens vindauget i apsida har opphavleg form. Korbogen mellom skip og kor er bevart. I forbindelse med restaureringen av kyrkja, vart det avdekka kalkmåleri frå 1600-talet av draperi og bordar på veggane i koret. Den sylinderforma preikestolen frå 1832 er dekorert med Den norske løva, som er eit sjeldant motiv på norske preikestolar. Løva er laga i intarsia med ulike innlagde tresortar.

Altertavla frå 1588 er den eldste etterreformatoriske altertavla ein kjenner i Noreg. Motivet er Moses og Aron og lovtavlene med dei ti bod, og i toppstykket ser ein Jahve-teiknet. Dei to gipsfigurane i kyrkja førestiller Peter og Paulus og er laga av den lokale skulptøren Olav Glosimot (1821-1901). Figurane stod opphavleg på alteret og flankerte den dåverande altertavla, måleriet av Nattverden, som no heng over sørportalen og er måla av Harald Lassen i 1879.

Omvisning med guide i juli. Kontakt turistinformasjonen for meir informasjon.